| Что нового | Оглавление | Поиск | Закладки | Словарь | Вход | EN / RU |
2. Dutiyavaggo (11-20) Палийский оригинал
| пали | Парибок А.В. - русский | Комментарии |
|
1. Pāsāṇasuttaṃ Таблица Палийский оригинал |
||
| 147.Ekaṃ samayaṃ bhagavā rājagahe viharati gijjhakūṭe pabbate. | ||
| Tena kho pana samayena bhagavā rattandhakāratimisāyaṃ abbhokāse nisinno hoti, devo ca ekamekaṃ phusāyati. | ||
| Atha kho māro pāpimā bhagavato bhayaṃ chambhitattaṃ lomahaṃsaṃ uppādetukāmo yena bhagavā tenupasaṅkami; upasaṅkamitvā bhagavato avidūre mahante pāsāṇe padālesi. | ||
| Atha kho bhagavā "māro ayaṃ pāpimā" iti viditvā māraṃ pāpimantaṃ gāthāya ajjhabhāsi – | ||
| "Sacepi kevalaṃ sabbaṃ, gijjhakūṭaṃ calessasi [gaḷeyyasi (syā. kaṃ.), caleyyāsi (ka.)] ; | ||
| Neva sammāvimuttānaṃ, buddhānaṃ atthi iñjita"ntntti. | ||
| Atha kho māro pāpimā "jānāti maṃ bhagavā, jānāti maṃ sugato"ti dukkhī dummano tatthevantaradhāyīti. | ||
|
2. Kinnusīhasuttaṃ Таблица Палийский оригинал |
||
| 148.Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. | ||
| Tena kho pana samayena bhagavā mahatiyā parisāya parivuto dhammaṃ deseti. | ||
| Atha kho mārassa pāpimato etadahosi – "ayaṃ kho samaṇo gotamo mahatiyā parisāya parivuto dhammaṃ deseti. | ||
| Yaṃnūnāhaṃ yena samaṇo gotamo tenupasaṅkameyyaṃ vicakkhukammāyā"ti. | ||
| Atha kho māro pāpimā yena bhagavā tenupasaṅkami; upasaṅkamitvā bhagavantaṃ gāthāya ajjhabhāsi – | ||
| "Kinnu sīhova nadasi, parisāyaṃ visārado; | ||
| Paṭimallo hi te atthi, vijitāvī nu maññasī"ti. | ||
| "Nadanti ve mahāvīrā, parisāsu visāradā; | ||
| Tathāgatā balappattā, tiṇṇā loke visattika"nti. | ||
| Atha kho māro pāpimā "jānāti maṃ bhagavā, jānāti maṃ sugato"ti dukkhī dummano tatthevantaradhāyīti. | ||
|
3. Sakalikasuttaṃ Таблица Палийский оригинал |
||
| 149.Evaṃ me sutaṃ – ekaṃ samayaṃ bhagavā rājagahe viharati maddakucchismiṃ migadāye. | ||
| Tena kho pana samayena bhagavato pādo sakalikāya khato hoti, bhusā sudaṃ bhagavato vedanā vattanti sārīrikā dukkhā tibbā kharā kaṭukā asātā amanāpā. | ||
| Tā sudaṃ bhagavā sato sampajāno adhivāseti avihaññamāno. | ||
| Atha kho bhagavā catugguṇaṃ saṅghāṭiṃ paññapetvā dakkhiṇena passena sīhaseyyaṃ kappesi pāde pādaṃ accādhāya sato sampajāno. | ||
| Atha kho māro pāpimā yena bhagavā tenupasaṅkami; upasaṅkamitvā bhagavantaṃ gāthāya ajjhabhāsi – | ||
| "Mandiyā nu kho sesi udāhu kāveyyamatto, | ||
| Atthā nu te sampacurā na santi; | ||
| Eko vivitte sayanāsanamhi, | ||
| Niddāmukho kimidaṃ soppase vā"ti. | ||
| "Na mandiyā sayāmi nāpi kāveyyamatto, | ||
| Atthaṃ sameccāhamapetasoko; | ||
| Eko vivitte sayanāsanamhi, | ||
| Sayāmahaṃ sabbabhūtānukampī. | ||
| "Yesampi sallaṃ urasi paviṭṭhaṃ, | ||
| Muhuṃ muhuṃ hadayaṃ vedhamānaṃ; | ||
| Tepīdha soppaṃ labhare sasallā, | ||
| Tasmā ahaṃ na supe vītasallo. | ||
| "Jaggaṃ na saṅke napi bhemi sottuṃ, | ||
| Rattindivā nānutapanti māmaṃ; | ||
| Hāniṃ na passāmi kuhiñci loke, | ||
| Tasmā supe sabbabhūtānukampī"ti. | ||
| Atha kho māro pāpimā "jānāti maṃ bhagavā, jānāti maṃ sugato"ti dukkhī dummano tatthevantaradhāyīti. | ||
|
4. Patirūpasuttaṃ Таблица Палийский оригинал |
||
| 150.Ekaṃ samayaṃ bhagavā kosalesu viharati ekasālāyaṃ brāhmaṇagāme. | ||
| Tena kho pana samayena bhagavā mahatiyā gihiparisāya parivuto dhammaṃ deseti. | ||
| Atha kho mārassa pāpimato etadahosi – "ayaṃ kho samaṇo gotamo mahatiyā gihiparisāya parivuto dhammaṃ deseti. | ||
| Yaṃnūnāhaṃ yena samaṇo gotamo tenupasaṅkameyyaṃ vicakkhukammāyā"ti. | ||
| Atha kho māro pāpimā yena bhagavā tenupasaṅkami; upasaṅkamitvā bhagavantaṃ gāthāya ajjhabhāsi – | ||
| "Netaṃ tava patirūpaṃ, yadaññamanusāsasi; | ||
| Anurodhavirodhesu, mā sajjittho tadācara"nti. | ||
| "Hitānukampī sambuddho, yadaññamanusāsati; | ||
| Anurodhavirodhehi, vippamutto tathāgato"ti. | ||
| Atha kho māro pāpimā "jānāti maṃ bhagavā, jānāti maṃ sugato"ti dukkhī dummano tatthevantaradhāyīti. | ||
|
5. Mānasasuttaṃ Таблица Палийский оригинал |
||
| 151.Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. | ||
| Atha kho māro pāpimā yena bhagavā tenupasaṅkami; upasaṅkamitvā bhagavantaṃ gāthāya ajjhabhāsi – | ||
| "Antalikkhacaro pāso, yvāyaṃ carati mānaso; | ||
| Tena taṃ bādhayissāmi, na me samaṇa mokkhasī"ti. | ||
| "Rūpā saddā rasā gandhā, phoṭṭhabbā ca manoramā; | ||
| Ettha me vigato chando, nihato tvamasi antakā"ti. | ||
| Atha kho māro pāpimā "jānāti maṃ bhagavā, jānāti maṃ sugato"ti dukkhī dummano tatthevantaradhāyīti. | ||
|
6. Pattasuttaṃ Таблица Палийский оригинал |
||
| 152.Sāvatthinidānaṃ. | ||
| Tena kho pana samayena bhagavā pañcannaṃ upādānakkhandhānaṃ upādāya bhikkhūnaṃ dhammiyā kathāya sandasseti samādapeti [samādāpeti (?)] samuttejeti sampahaṃseti. | ||
| Te ca bhikkhū aṭṭhiṃ katvā [aṭṭhikatvā (sī. syā. kaṃ. pī.)] manasi katvā sabbacetasā [sabbacetaso (sī. syā. kaṃ. pī.), sabbaṃ cetasā (ka.)] samannāharitvā ohitasotā dhammaṃ suṇanti. | ||
| Atha kho mārassa pāpimato etadahosi – "ayaṃ kho samaṇo gotamo pañcannaṃ upādānakkhandhānaṃ upādāya bhikkhūnaṃ dhammiyā kathāya sandasseti samādapeti samuttejeti sampahaṃseti. | ||
| Te ca bhikkhū aṭṭhiṃ katvā manasi katvā sabbacetasā samannāharitvā ohitasotā dhammaṃ suṇanti. | ||
| Yaṃnūnāhaṃ yena samaṇo gotamo tenupasaṅkameyyaṃ vicakkhukammāyā"ti. | ||
| Tena kho pana samayena sambahulā pattā abbhokāse nikkhittā honti. | ||
| Atha kho māro pāpimā balībaddavaṇṇaṃ abhinimminitvā yena te pattā tenupasaṅkami. | ||
| Atha kho aññataro bhikkhu aññataraṃ bhikkhuṃ etadavoca – "bhikkhu, bhikkhu, eso balībaddo patte bhindeyyā"ti. | ||
| Evaṃ vutte bhagavā taṃ bhikkhuṃ etadavoca – "na so, bhikkhu, balībaddo. | ||
| Māro eso pāpimā tumhākaṃ vicakkhukammāya āgato"ti. | ||
| Atha kho bhagavā "māro ayaṃ pāpimā" iti viditvā māraṃ pāpimantaṃ gāthāya ajjhabhāsi – | ||
| "Rūpaṃ vedayitaṃ saññā, viññāṇaṃ yañca saṅkhataṃ; | ||
| Nesohamasmi netaṃ me, evaṃ tattha virajjati. | ||
| "Evaṃ virattaṃ khemattaṃ, sabbasaṃyojanātigaṃ; | ||
| Anvesaṃ sabbaṭṭhānesu, mārasenāpi nājjhagā"ti. | ||
| Atha kho māro pāpimā - pe - tatthevantaradhāyīti. | ||
|
7. Chaphassāyatanasuttaṃ Таблица Палийский оригинал |
||
| 153.Ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. | ||
| Tena kho pana samayena bhagavā channaṃ phassāyatanānaṃ upādāya bhikkhūnaṃ dhammiyā kathāya sandasseti samādapeti samuttejeti sampahaṃseti. | ||
| Te ca bhikkhū aṭṭhiṃ katvā manasi katvā sabbacetasā samannāharitvā ohitasotā dhammaṃ suṇanti. | ||
| Atha kho mārassa pāpimato etadahosi – "ayaṃ kho samaṇo gotamo channaṃ phassāyatanānaṃ upādāya bhikkhūnaṃ dhammiyā kathāya sandasseti samādapeti samuttejeti sappahaṃseti. | ||
| Te ca bhikkhū aṭṭhiṃ katvā manasi katvā sabbacetasā samannāharitvā ohitasotā dhammaṃ suṇanti. | ||
| Yaṃnūnāhaṃ yena samaṇo gotamo tenupasaṅkameyyaṃ vicakkhukammāyā"ti. | ||
| Atha kho māro pāpimā yena bhagavā tenupasaṅkami; upasaṅkamitvā bhagavato avidūre mahantaṃ bhayabheravaṃ saddamakāsi, apissudaṃ pathavī maññe undrīyati [udrīyati (sī. syā. kaṃ. pī) u + dara + ya + ti = udrīyati]. | ||
| Atha kho aññataro bhikkhu aññataraṃ bhikkhuṃ etadavoca – "bhikkhu, bhikkhu, esā pathavī maññe undrīyatī"ti. | ||
| Evaṃ vutte, bhagavā taṃ bhikkhuṃ etadavoca – "nesā bhikkhu pathavī undrīyati. | ||
| Māro eso pāpimā tumhākaṃ vicakkhukammāya āgato"ti. | ||
| Atha kho bhagavā "māro ayaṃ pāpimā" iti viditvā māraṃ pāpimantaṃ gāthāya ajjhabhāsi – | ||
| "Rūpā saddā rasā gandhā, phassā dhammā ca kevalā; | ||
| Etaṃ lokāmisaṃ ghoraṃ, ettha loko vimucchito. | ||
| "Etañca samatikkamma, sato buddhassa sāvako; | ||
| Māradheyyaṃ atikkamma, ādiccova virocatī"ti. | ||
| Atha kho māro pāpimā - pe - tatthevantaradhāyīti. | ||
|
СН 4.28 Таблица Палийский оригинал |
||
| 154.Ekaṃ samayaṃ bhagavā magadhesu viharati pañcasālāyaṃ brāhmaṇagāme. | Однажды Блаженный находился в Магадхе, у Пяти Салов — брахманской деревни. | |
| Tena kho pana samayena pañcasālāyaṃ brāhmaṇagāme kumārikānaṃ pāhunakāni bhavanti. | В то время там у мальчиков были гости. | |
| Atha kho bhagavā pubbaṇhasamayaṃ nivāsetvā pattacīvaramādāya pañcasālaṃ brāhmaṇagāmaṃ piṇḍāya pāvisi. | И Блаженный вошел в Пять Салов за милостыней. | |
| Tena kho pana samayena pañcasāleyyakā brāhmaṇagahapatikā mārena pāpimatā anvāviṭṭhā bhavanti – mā samaṇo gotamo piṇḍamalatthāti. | Но тогда пятисальских брахманов обуял лукавый Мара: «Пусть не получит шраман Готама милостыни». | |
| Atha kho bhagavā yathādhotena pattena pañcasālaṃ brāhmaṇagāmaṃ piṇḍāya pāvisi tathādhotena [yathādhotena (?)] pattena paṭikkami. | И как вошел Блаженный в Пять Салов с чистой, вымытой миской, так и вышел оттуда с чистой, вымытой миской. | |
| Atha kho māro pāpimā yena bhagavā tenupasaṅkami; upasaṅkamitvā bhagavantaṃ etadavoca – "api tvaṃ, samaṇa, piṇḍamalatthā"ti? | И приблизился к Блаженному лукавый Мара. Приблизившись, сказал Блаженному: «Ну, шраман, получил милостыню?» | |
| "Tathā nu tvaṃ, pāpima, akāsi yathāhaṃ piṇḍaṃ na labheyya"nti. | — «Ты же сам так сделал, Лукавый, что я не получил милостыни». | |
| "Tena hi, bhante, bhagavā dutiyampi pañcasālaṃ brāhmaṇagāmaṃ piṇḍāya pavisatu. | — «Тогда, Блаженный, войди еще раз в брахманскую деревню Пять Салов. | |
| Tathāhaṃ karissāmi yathā bhagavā piṇḍaṃ lacchatī"ti. | Я так сделаю, что получит Блаженный милостыню». | |
| "Apuññaṃ pasavi māro, āsajja naṃ tathāgataṃ; | «Дурное ты содеял, Мара: Ты навредил Татхагате. | |
| Kiṃ nu maññasi pāpima, na me pāpaṃ vipaccati. | Уж не надеешься ли ты, Что не вернется к тебе грех? | |
| "Susukhaṃ vata jīvāma, yesaṃ no natthi kiñcanaṃ; | Хотя у нас нет ничего, Мы живем очень счастливо. | |
| Pītibhakkhā bhavissāma, devā ābhassarā yathā"ti. | Будем питаться радостью, Словно боги Сияющие».— | |
| Atha kho māro pāpimā "jānāti maṃ bhagavā, jānāti maṃ sugato"ti dukkhī dummano tatthevantaradhāyīti. | «Узнал меня Блаженный», — с тяжким крушением подумал лукавый Мара и тотчас пропал. | |
|
9. Kassakasuttaṃ Таблица Палийский оригинал |
||
| 155.Sāvatthinidānaṃ. | ||
| Tena kho pana samayena bhagavā bhikkhūnaṃ nibbānapaṭisaṃyuttāya dhammiyā kathāya sandasseti samādapeti samuttejeti sampahaṃseti. | ||
| Te ca bhikkhū aṭṭhiṃ katvā manasi katvā sabbacetasā samannāharitvā ohitasotā dhammaṃ suṇanti. | ||
| Atha kho mārassa pāpimato etadahosi – "ayaṃ kho samaṇo gotamo bhikkhūnaṃ nibbānapaṭisaṃyuttāya dhammiyā kathāya - pe - yaṃnūnāhaṃ yena samaṇo gotamo tenupasaṅkameyyaṃ vicakkhukammāyā"ti. | ||
| Atha kho māro pāpimā kassakavaṇṇaṃ abhinimminitvā mahantaṃ naṅgalaṃ khandhe karitvā dīghapācanayaṭṭhiṃ gahetvā haṭahaṭakeso sāṇasāṭinivattho kaddamamakkhitehi pādehi yena bhagavā tenupasaṅkami; upasaṅkamitvā bhagavantaṃ etadavoca – "api, samaṇa, balībadde addasā"ti? | ||
| "Kiṃ pana, pāpima, te balībaddehī"ti? | ||
| "Mameva, samaṇa, cakkhu, mama rūpā, mama cakkhusamphassaviññāṇāyatanaṃ. | ||
| Kuhiṃ me, samaṇa, gantvā mokkhasi? | ||
| Mameva, samaṇa, sotaṃ, mama saddā - pe - mameva, samaṇa, ghānaṃ, mama gandhā; mameva, samaṇa, jivhā, mama rasā; mameva, samaṇa, kāyo, mama phoṭṭhabbā; mameva, samaṇa, mano, mama dhammā, mama manosamphassaviññāṇāyatanaṃ. | ||
| Kuhiṃ me, samaṇa, gantvā mokkhasī"ti? | ||
| "Taveva, pāpima, cakkhu, tava rūpā, tava cakkhusamphassaviññāṇāyatanaṃ. | ||
| Yattha ca kho, pāpima, natthi cakkhu, natthi rūpā, natthi cakkhusamphassaviññāṇāyatanaṃ, agati tava tattha, pāpima. | ||
| Taveva, pāpima, sotaṃ, tava saddā, tava sotasamphassaviññāṇāyatanaṃ. | ||
| Yattha ca kho, pāpima, natthi sotaṃ, natthi saddā, natthi sotasamphassaviññāṇāyatanaṃ, agati tava tattha, pāpima. | ||
| Taveva, pāpima, ghānaṃ, tava gandhā, tava ghānasamphassaviññāṇāyatanaṃ. | ||
| Yattha ca kho, pāpima, natthi ghānaṃ, natthi gandhā, natthi ghānasamphassaviññāṇāyatanaṃ, agati tava tattha, pāpima. | ||
| Taveva, pāpima, jivhā, tava rasā, tava jivhāsamphassaviññāṇāyatanaṃ - pe - taveva, pāpima, kāyo, tava phoṭṭhabbā, tava kāyasamphassaviññāṇāyatanaṃ - pe - taveva, pāpima, mano, tava dhammā, tava manosamphassaviññāṇāyatanaṃ. | ||
| Yattha ca kho, pāpima, natthi mano, natthi dhammā, natthi manosamphassaviññāṇāyatanaṃ, agati tava tattha, pāpimā"ti. | ||
| "Yaṃ vadanti mama yidanti, ye vadanti mamanti ca; | ||
| Ettha ce te mano atthi, na me samaṇa mokkhasī"ti. | ||
| "Yaṃ vadanti na taṃ mayhaṃ, ye vadanti na te ahaṃ; | ||
| Evaṃ pāpima jānāhi, na me maggampi dakkhasī"ti. | ||
| Atha kho māro pāpimā - pe - tatthevantaradhāyīti. | ||
|
10. Rajjasuttaṃ Таблица Палийский оригинал |
||
| 156.Ekaṃ samayaṃ bhagavā kosalesu viharati himavantapadese [himavantapasse (sī.)] araññakuṭikāyaṃ. | ||
| Atha kho bhagavato rahogatassa paṭisallīnassa evaṃ cetaso parivitakko udapādi – "sakkā nu kho rajjaṃ kāretuṃ ahanaṃ aghātayaṃ ajinaṃ ajāpayaṃ asocaṃ asocāpayaṃ dhammenā"ti? | ||
| Atha kho māro pāpimā bhagavato cetasā cetoparivitakkamaññāya yena bhagavā tenupasaṅkami; upasaṅkamitvā bhagavantaṃ etadavoca – "kāretu, bhante, bhagavā rajjaṃ, kāretu, sugato, rajjaṃ ahanaṃ aghātayaṃ ajinaṃ ajāpayaṃ asocaṃ asocāpayaṃ dhammenā"ti. | ||
| "Kiṃ pana me tvaṃ, pāpima, passasi yaṃ maṃ tvaṃ evaṃ vadesi – 'kāretu, bhante, bhagavā rajjaṃ, kāretu sugato, rajjaṃ ahanaṃ aghātayaṃ ajinaṃ ajāpayaṃ asocaṃ asocāpayaṃ dhammenā"'ti? | ||
| "Bhagavatā kho, bhante, cattāro iddhipādā bhāvitā bahulīkatā yānīkatā vatthukatā anuṭṭhitā paricitā susamāraddhā. | ||
| Ākaṅkhamāno ca, bhante, bhagavā himavantaṃ pabbatarājaṃ suvaṇṇaṃ tveva adhimucceyya suvaṇṇañca panassā"ti [suvaṇṇapabbatassāti (sī. syā. kaṃ.), suvaṇṇañca pabbatassāti (pī.)]. | ||
| "Pabbatassa suvaṇṇassa, jātarūpassa kevalo; | ||
| Dvittāva nālamekassa, iti vidvā samañcare. | ||
| "Yo dukkhamaddakkhi yatonidānaṃ, | ||
| Kāmesu so jantu kathaṃ nameyya; | ||
| Upadhiṃ viditvā saṅgoti loke, | ||
| Tasseva jantu vinayāya sikkhe"ti. | ||
| Atha kho māro pāpimā "jānāti maṃ bhagavā, jānāti maṃ sugato"ti dukkhī dummano tatthevantaradhāyīti. | ||
| Dutiyo vaggo. | ||
| Tassuddānaṃ – | ||
| Pāsāṇo sīho sakalikaṃ [sakkhalikaṃ (ka.)], patirūpañca mānasaṃ; | ||
| Pattaṃ āyatanaṃ piṇḍaṃ, kassakaṃ rajjena te dasāti. | ||