Vattaṃ katvāti adhiṭṭhānavattaṃ katvā. "Saccavādī bhūtavādī"ti kittiṃ pappotīti yojanā. Icchitapatthitanti yehi mittaṃ icchati, tehi itaraṃ patthitaṃ. Mittāni ganthatīti mittabhāvaṃ ghaṭeti. Dānassa piyabhāvakaraṇato "dadaṃ piyo hotī"ti vuttaṃ. Yaṃ dānaṃ ekantato mittabhāvāvahaṃ, taṃ dassento "duddadaṃ vā dadaṃ taṃ ganthatī"ti āha. Dadanti ca lakkhaṇavacanametanti āha "dānamukhena vā"tiādi.