17. Kusalākusaladhammehi ālambiyamānāpi ārammaṇadhammā āvajjanamukheneva tabbhāvaṃ gacchantīti dassento "manasikaraṇīye"ti padassa "āvajjitabbe"ti atthamāha. Hitasukhāvahabhāvena manasikaraṇaṃ arahantīti manasikaraṇīyā, tappaṭipakkhato amanasikaraṇīyāti āha "amanasikaraṇīyeti tabbiparīte"ti. Sesapadesūti "manasikaraṇīye dhamme appajānanto"tiādīsu. Yasmā kusaladhammesupi subhasukhaniccādivasena manasikāro assādanādihetutāya sāvajjo ahitadukkhāvaho akusaladhammesupi aniccādivasena manasikāro nibbidādihetutāya anavajjo hitasukhāvaho, tasmā "dhammato niyamo natthī"ti vatvā "ākārato pana atthī"ti āha.