Что нового Оглавление Поиск Закладки Словарь Вход EN / RU
Адрес: Три корзины (основные тексты) >> Корзина наставлений (Сутта Питака) >> Собрание связанных наставлений (Санъютта никая) >> 4. Коллекция о Маре >> 1. Paṭhamavaggo (1-10) >> 9. Paṭhamaāyusuttaṃ
<< Назад 1. Paṭhamavaggo (1-10) Далее >>
Отображение колонок


9. Paṭhamaāyusuttaṃ Палийский оригинал

пали Комментарии
145.Evaṃ me sutaṃ – ekaṃ samayaṃ bhagavā rājagahe viharati veḷuvane kalandakanivāpe.
Tatra kho bhagavā bhikkhū āmantesi – "bhikkhavo"ti.
"Bhadante"ti te bhikkhū bhagavato paccassosuṃ.
Bhagavā etadavoca –
"Appamidaṃ, bhikkhave, manussānaṃ āyu.
Gamanīyo samparāyo, kattabbaṃ kusalaṃ, caritabbaṃ brahmacariyaṃ.
Natthi jātassa amaraṇaṃ.
Yo, bhikkhave, ciraṃ jīvati, so vassasataṃ appaṃ vā bhiyyo"ti.
Atha kho māro pāpimā yena bhagavā tenupasaṅkami; upasaṅkamitvā bhagavantaṃ gāthāya ajjhabhāsi –
"Dīghamāyu manussānaṃ, na naṃ hīḷe suporiso;
Careyya khīramattova, natthi maccussa āgamo"ti.
"Appamāyu manussānaṃ, hīḷeyya naṃ suporiso;
Careyyādittasīsova, natthi maccussa nāgamo"ti.
Atha kho māro - pe - tatthevantaradhāyīti.
<< Назад 1. Paṭhamavaggo (1-10) Далее >>