|
158."Pañcahi, bhikkhave, dhammehi samannāgato bhikkhu sārajjaṃ okkanto [okkamanto (ka.)] hoti.
|
|
|
Idha, bhikkhave, bhikkhu assaddho hoti, dussīlo hoti, appassuto hoti, kusīto hoti, dupañño hoti.
|
|
|
Imehi kho, bhikkhave, pañcahi, dhammehi samannāgato bhikkhu sārajjaṃ okkanto hoti.
|
|
|
"Pañcahi, bhikkhave, dhammehi samannāgato bhikkhu visārado hoti.
|
|
|
Idha, bhikkhave, bhikkhu saddho hoti, sīlavā hoti, bahussuto hoti, āraddhavīriyo hoti, paññavā hoti.
|
|
|
Imehi kho, bhikkhave, pañcahi dhammehi samannāgato bhikkhu visārado hotī"ti.
|
|